आजचे २१ वे शतक हे खऱ्या अर्थाने माहिती तंत्रज्ञानाचे आणि विज्ञानाचे युग आहे. मानवाने लावलेल्या अनेक अफाट शोधांपैकी 'संगणक' हा एक असा शोध आहे, ज्याने संपूर्ण जगाचे चित्रच बदलून टाकले आहे. सुरुवातीच्या काळात संगणकाचा वापर केवळ मोठी गणिती आकडेमोड करण्यासाठी केला जात असे. मात्र, आज मानवी जीवनाचे असे एकही क्षेत्र उरलेले नाही, जिथे संगणकाचा वापर होत नाही. म्हणूनच, आजच्या धावपळीच्या युगात संगणक ही केवळ चैनीची वस्तू न राहता ती एक अत्यावश्यक गरज बनली आहे.
शिक्षण क्षेत्रात तर संगणकाने मोठी क्रांती घडवून आणली आहे. आज इंटरनेटच्या माध्यमातून जगाच्या पाठीवरचे कोणतेही ज्ञान एका 'क्लिक'वर विद्यार्थ्या उपलब्ध झाले आहे. कठीण संकल्पना समजून घेण्यासाठी ई-लर्निंगचा वापर वाढला आहे. केवळ शिक्षणच नव्हे, तर बँकिंग, वैद्यकीय क्षेत्र, संरक्षण विभाग, रेल्वे व विमान आरक्षण आणि व्यापार अशा सर्वच ठिकाणी संगणकामुळे कामात कमालीची अचूकता आणि वेग आला आहे. मानवाला जे काम करण्यासाठी अनेक दिवस लागत असत, तेच काम संगणक आता काही सेकंदात पूर्ण करतो.
संगणकामुळे जग खूप जवळ आले आहे. 'जागतिक खेडे' (Global Village) ही संकल्पना संगणकामुळेच प्रत्यक्षात आली आहे. सोशल मीडिया आणि व्हिडिओ कॉलिंगद्वारे आपण कोणाशीही क्षणात संवाद साधू शकतो. मात्र, संगणकाचा वापर करताना आपण त्याचे गुलाम होता कामा नये. संगणकाचा वापर हा मानवाच्या प्रगतीसाठी आणि विधायक कामांसाठीच व्हायला हवा. ज्याप्रमाणे आपल्याला वाचन आणि लेखन येणे आवश्यक आहे, त्याचप्रमाणे आजच्या युगात 'संगणक साक्षर' होणे देखील तितकेच महत्त्वाचे आहे. संगणकाचे ज्ञान हीच भविष्यातील यशाची गुरुकिल्ली आहे.
कोणत्याही टिप्पण्या नाहीत:
टिप्पणी पोस्ट करा