मराठी उपयोजित लेखन : पत्र लेखन
प्रमुख पाहुणे: मा. श्री. अजय लागू | अध्यक्ष: मा. श्री. उत्तम कांबळे
संपर्क: jjvn@gmail.com | विद्यार्थी प्रतिनिधी: दीपक/दीपाली माने
दिनांक: १० जानेवारी, २०२६.
प्रति,
सुहास देसाई,
जीवनज्योती विद्यालय, नांदगाव.
विषय: कथाकथन स्पर्धेत यश मिळवल्याबद्दल अभिनंदन.
प्रिय सुहास, सप्रेम नमस्कार.
आपल्या शाळेत पार पडलेल्या 'कथाकथन स्पर्धा' पारितोषिक वितरण समारंभाची बातमी समजली. या स्पर्धेत तुला प्रथम क्रमांकाचे पारितोषिक मिळाले, हे ऐकून मनस्वी आनंद झाला. तुझे मनापासून अभिनंदन!
तुझी कथा मांडण्याची पद्धत आणि आवाजातील चढ-उतार खरोखरच कौतुकास्पद आहेत. मा. श्री. अजय लागू यांच्या हस्ते तुला हा सन्मान मिळाला, ही आपल्या सर्वांसाठी अभिमानाची गोष्ट आहे. तुझे हे यश तुझ्या मेहनतीचे फळ आहे. भविष्यातही तू असाच प्रगतीचा आलेख उंचावत ठेवशील, याची मला खात्री आहे. तुला पुढील वाटचालीस खूप खूप शुभेच्छा!
तुझा मित्र,
दीपक माने
(विद्यार्थी प्रतिनिधी)
दिनांक: ०१ जानेवारी, २०२६.
प्रति,
मा. श्री. उत्तम कांबळे साहेब,
सातारा ता. जि. सातारा.
विषय: पारितोषिक वितरण समारंभाचे 'अध्यक्ष' म्हणून उपस्थित राहण्याबाबत विनंती.
माननीय महोदय,
सप्रेम नमस्कार.
आपल्याला कळवण्यास अत्यंत आनंद होतो की, आमच्या 'जीवनज्योती विद्यालय, नांदगाव' तर्फे दरवर्षीप्रमाणे यावर्षीही भव्य 'कथाकथन स्पर्धा' आयोजित केली आहे. या स्पर्धेचा मुख्य 'पारितोषिक वितरण समारंभ' येत्या ०८ जानेवारी रोजी दुपारी ४ वाजता शाळेच्या सभागृहात संपन्न होणार आहे.
आपण साहित्याच्या क्षेत्रातील एक जाणकार व्यक्तिमत्व आहात. आपली उपस्थिती आम्हा विद्यार्थ्यांसाठी प्रेरणादायी ठरेल. तरी, या समारंभाचे 'अध्यक्ष' स्थान आपण भूषवावे, अशी मी विद्यालयाचा 'विद्यार्थी प्रतिनिधी' या नात्याने आपणास नम्र विनंती करतो. प्रमुख पाहुणे म्हणून मा. श्री. अजय लागू उपस्थित राहणार आहेत.
आपण आमची विनंती मान्य कराल, अशी मला खात्री आहे. आपल्या प्रतिसादाच्या प्रतीक्षेत.
आपला नम्र,
दीपक माने
(विद्यार्थी प्रतिनिधी)
कोणत्याही टिप्पण्या नाहीत:
टिप्पणी पोस्ट करा